Qeveria e Kosovës në mbledhjen e mbajtur më 15 janar 2016 ka miratuar Programin Legjislativ 2016. Ky program përmban projektligjet të cilat ministritë e caktuara dhe Zyra e Kryeministrit kanë paraparë të hartojnë gjatë 2016. Nga 19 ministri sa ka Qeveria, katër ministri nuk kanë planifikuar hartimin e ndonjë projektligji: Ministria e Diasporës, Ministria për Komunitete dhe Kthim, Ministria e Integrimit Evropian dhe Ministria e Punëve të Jashtme.
Të 15 ministritë tjera dhe Zyra e Kryeministrit kanë planifikuar të hartojnë 88 projektligje nga të cilat 45 janë plotësim ndryshim i ligjeve ekzistuese derisa 43 tjera janë projektligje për t'u bërë ligje të tjera në Kosovë. Me numrin më të madh të projektligjeve janë Ministria e Financave, Zyra e Kryeministrit dhe Ministria e Drejtësisë. SiÇ vërehet lehtë në program, numër më i madh i projektligjeve është planifikuar për plotësim ndryshim të ligjeve ekzistuese në krahasim me numrin e projektligjeve të reja. Ky është një tregues i mirë i cilësisë së hartimit të projektligjeve e deri te miratimi i tyre në Kuvend. është bërë tashmë e zakonshme që disa ligje i nënshtrohen plotësim ndryshimit ende pa filluar mirë zbatimi i tyre në praktikë, apo që disa ligje të miratuara nuk kanë gjetur zbatim për shkak të defekteve të tyre dhe shumë shpejt janë provuar të pa zbatueshme.
Nje trend i tillë i programeve legjislative me numër më të madh të projektigjeve për plotësim ndryshim të ligje ekzistuese në krahasim me projektligjet që të bëhen ligje të reja, vërehet tani e disa vite. Nga një analizë e shkurtër e programeve legjislative nga viti 2011 vërehet se gjithmonë numri i projektligjeve për plotësim ndryshim ka qenë më i madh se numri i projektligjeve që janë planifikuar si ligje të reja në Kosovë. Për shembull, vitin e kaluar ishin planifikuar 74 projektligje si plotësim ndryshime dhe 55 si ligje të reja.