Instituti GAP është një Think Tank i themeluar në vitin 2007 në Kosovë. Përgjatë këtyre viteve, GAP ka qenë direkt pjesëmarrës në dhjetëra grupe punuese qeveritare për hartim të politikave dhe një numër i madh i dokumenteve publike që tani ndodhen në zbatim njohin kontributin e GAP gjatë procesit të hartimit të tyre. GAP ka publikuar me dhjetëra analiza dhe raporte; GAP u ka dhënë hapësirë për punë një numri të madh të profesionistëve të fushave të ndryshme; publikimet e GAP janë ndër më të cituarat në mediat vendore dhe raporte të ndryshme ndërkombëtare; studiues të shumtë, të cilët merren me zhvillimet politike në Kosovë, kanë cituar publikimet e GAP në studimet e tyre.
Instituti GAP synon që të mbushë hendekun në mes të qeverisjes dhe qytetarëve, në mes të problemeve dhe zgjidhjeve, me qëllim të avancimit të shoqërisë kosovare. Këtë e bëjmë duke avokuar për një qeverisje më të mirë, duke monitoruar punën e institucioneve publike, dhe duke rekomanduar zgjidhje konkrete mbi politikat publike. GAP adreson sfidat ekonomike, politike dhe sociale në vend duke mobilizuar profesionistë të fushave të ndryshme.
Instituti GAP është duke kërkuar Drejtor/e të Hulumtimeve me përvojë të gjatë dhe me njohuri në fushën e politikave publike. Kandidati/ja duhet të plotësojë këto kushte:
- Të ketë kualifikime akademike në ndonjë fushë që ndërlidhet me politikat publike (zhvillimi ekonomik, ekonomiks, shkenca politike, energji, financa publike)
- Të ketë mbi pesë vite pervojë pune në dizajnimin dhe menaxhim e hulumtimeve (e preferuar përvoja në ndonjë think-tank vendor ose të huaj)
- Përvojë të mëparshme në pozita të ngjashme ose ekuivalente
- Të ketë publikime, si autor/e ose bashkë-autor/e e analizave/studimeve në fushën e politikave publike
- Të posedojë shkathtësi për prezentimin e studimeve
- Aftësi të mira të shkrimit në gjuhën shqipe dhe angleze
Instituti GAP është një think-tank vendor me 16 vite përvojë në kërkime dhe avokim për politika më të mira publike.
Për të aplikuar për këtë pozitë ju lutem dërgoni CV-në tuaj dhe një letër motivimi, si dhe një publikim/punim (në gjuhën shqipe ose angleze) në info@institutigap.org.
Konkursi është i hapur deri më 30 nëntor 2023. Vetëm kandidatët/et që përmbushin kriteret e lartëpërmendura do të kontaktohen. Kandidatët/et e kontaktuar do t’i zhvillojnë deri në dy raunde intervistash.