Gabimet e Institucioneve Ndërkombëtare Financiare në Kosovë

Institucionet ndërkombëtare financiare, siç janë Banka Botërore, Fondi Monetar Ndërkombëtar dhe Banka Evropiane për Rindërtim dhe Zhvillim, partner kryesor të tyre kanë qeveritë e vendeve me të cilat ato operojnë. Në këtë mënyrë ato mbështesin pothuajse të gjitha planet e partnerëve të tyre. Ajo çfarë këto institucione kanë gabuar historikisht dhe vazhdojnë të gabojnë është lënia anash e akterëve të tjerë publik në një vend të caktuar. Përfshirja në konsultime e akterëve tjerë jo qeveritar, siç janë organizatat e shoqërisë civile, ekspertët e pavarur, sindikatat e punëtorëve, grupet politike opozitare, mediat, etj., ka rëndësi shumë të madhe sidomos në vendet në zhvillim, me korrupsion të lartë dhe demokraci të brishtë.

Në rastin e Kosovës, institucionet ndërkombëtare financiare nuk kanë zhvilluar bashkëpunim të rregullt me akterët jo qeveritarë. Partneri i tyre kryesor dhe i vetëm mbetet Qeveria, ani pse kjo e fundit këtë partneritet e zhvillon pa ndonjë strategji zhvillimore ekonomike. Pikërisht për këtë fakt, ato bëjnë gabimet e njëjta sikurse Qeveria e Kosovës. Një muaj më parë, presidenti i Bankës Botërore Dr.Jin Yong Kim, deklaroi se “BB do të mbështes ndërtimin e një termocentrali të ri në Kosovë ngase nuk do të lejoj që njerëzit atje të vdesin nga të ftohtit”! E njëjta deklaratë u përsërit javën e kaluar edhe nga Gino Alzetta – Drejtor i Bankës Botërore për Kosovën dhe vendet tjera. Në vizitën e tij në Prishtinë, z.Alzetta deklaroi se ekonomia e Kosovës nuk është në gjendje edhe aq të keqe, dhe vazhdoi, “se BB nuk do të lejoj që njerëzit në Kosovë të vdesin nga të ftohtit, në mungesë të energjisë elektrike.”

Së pari, nëse njerëzit vdesin nga të ftohtit në mungesë energjisë elektrike, atëherë ai vend është në gjendje shumë të vështirë ekonomike pasi që mungojnë komoditete bazë, si energjia. Së dyti, ndërtimi i termocentralit të ri me qëllim që njerëzit të nxehen prej tij, është logjika më e dëmshme e zhvillimit energjetik dhe ekonomik në përgjithësi. Kjo dëshmon më së miri se përse po ndërtohet një termocentral i ri në Kosovë: për të shtuar kapacitetet e prodhimit të energjisë me bazë qymyri, pa u kujdesur fare për eficiencën e energjisë, pa eliminuar humbjet teknike dhe vjedhjet komerciale të energjisë dhe pa i marrë për bazë burimet alternative.

Ajo çfarë i shpëton kosovarët nga vdekja nga të ftohtit është krijimi i mundësisë që ngrohja gjatë dimrit të vije nga ngrohtoret ose izolimi më i mirë i shtëpive dhe jo nga elektriciteti. Nëse tentohet që përmes sigurimit të mjaftueshëm të energjisë elektrike të zgjidhet edhe problemi i ngrohjes, Banka Botërore vetëm se do e rëndoj gjendjen ekonomike të kosovarëve. Kosova nuk do të zhvillohet ekonomikisht nëse strategjia e Bankës Botërore dhe Qeverisë së Kosovës është shpëtimi i njerëzve nga vdekja nga të ftohtit, e mbytja e tyre me fatura të fryra të energjisë elektrike e cila do të përdoret për ngrohje të hapësirave të banimit.