Kush mund t’i japë përgjigje nipit tim?

Të ulur para televizionit interesimi im ishte krejtësisht i fokusuar në lajmet e ditës të së hënës. Lajmet nisin me protestat e gjakovarëve dhe pamundësinë e Aleksander Vulinit për të vizituar manastirin ortodoks serb në këtë qytet. Qëndroja në dhomë së bashku me nipin 12 vjeçar. Kisha një bindje se atij me shumë po i interesonte krisma e zjarrit në shporet se sa ajo që shikoja në televizion.

Ai ndonëse dukej i pa interesuar për lajmet, nga pyetjet që m’i parashtroi krijova bindjen që i ka dëgjuar ato më vëmendje. “E pse dajë ata e kanë lanë me hy në Kosovë e nuk po e lanë me hy në Gjakovë?” Nga kjo pyetje sa isha i befasuar aq edhe i ngushtuar, jo pse me pyeti, por nuk dija se si t’i përgjigjesha. Zgjodha që t’i jap një përgjigje të ngjashme me atë se si e interpretonin televizionet tona protestën e se hënës të gjakovarëve.

Vendosa që t’i jap një përgjigje të ngjashme me atë të retorikes politike të liderëve kosovarë. “Po shiko tani po mundohemi që t’i rregullojmë raportet me Serbinë, a e ke mësuar nga historia që Franca dhe Gjermania kanë luftuar shumë mes veti, por tani janë miq të mirë”. Por, duket që nipi kishte mësuar mirë mësimin nga faqet e historisë së klasës së pestë. “Po, por, Franca hala merr pare prej Gjermanie për shkak të shtëpive që ua kanë kall e ne a marrim pare prej Serbia”. Këtu u bëra i drejtpërdrejt, “jo nuk marrim para nga Serbia”. “E a po e sheh se Kosova dhe Serbia nuk janë njëjtë si Franca dhe Gjermania” m’u kundërpërgjigj nipi.

E pranoj që pyetjet e nipit me ngjallën befasi, por me vunë edhe në huti. E pranoj që më mungoi sinqeriteti në bisedë me nipin, për faktin se zgjodha të mos bëjë bisedë me nuanca të urrejtjes dhe frikës. Në fund, vendosa ta çorientoj bisedën me nipin, e pyeta se çka mendon ai që do të bëhet kur të rritet, një pyetje kjo e zakonshme dhe e përgjithshme në mjediset kosovare. “Do ta studioj fizikën, me pëlqen”. Këtu e përmbylla bisedën me nipin. Nëse ai do te arrijë të studiojë fiziken, atëherë do të mësojë diçka të vlefshme edhe nga politika, raportin e forcave dhe ndër-lidhshmërinë mes aksionit dhe reaksionit.

Nipi do të vazhdojë të rritet, shume dilema e pyetje do t’i gjejë e zgjidh vete, por po kaq dilema e pyetje do të mund t’i krijohen e t’i bëhen të pashpjegueshme. Nipi doli për pak, por pyetjet e tij me futen në mendime. Aleksander Vulinit iu ndalua të hyjë të hënën në Gjakovë, por i njëjti tash e dy vite shëtitet cep më cep të Kosovës, deri vonë me uniformen e paramilitarit e me çizme ushtarake. Liderët kosovarë në çdo takim, për çdo ditë e në çdo deklaratë thërrasin e bërtasin për vlera evropiane, të integrimit , pajtimit e normalizimit. Vulini, ndërkaq e bënë të kundërtën. Thërret serbët që ta dëgjojnë Beogradin, e quan Kosovën “djep të tyre” dhe betohet se do të krijojë ‘republika serpska në Kosovë’.