Çka pas plotësimit të dëshirës së Pacollit?

Më në fund u realizua dëshira partnerit qeverisës AKR për të udhëhequr me Ministrinë e Zhvillimit Ekonomik. Tani, kur kanë mbetur edhe një vit e gjysmë nga përfundimi i mandatit aktual qeverisës, AKR udhëheq me dy ministritë kryesore të zhvillimit ekonomik: MZHE dhe MTI. Çka tash? Çfarë do të ndodhë pas ndërrimit të titullarit të MZHE?

MZHE është përgjegjëse, ndër të tjera, për menaxhimin e tri proceseve të rëndësishme ekonomike aktuale: privatizimin e PTK, politikat energjetike dhe ristrukturimi i Trepçës. AKR dhe lideri i saj shpeshherë kanë dërguar sinjale të kundërta me partnerin qeverisës PDK sa i përket këtyre tri proceseve. Si do t’i vazhdojë AKR këto procese, dy nga të cilat vetëm se janë në fazën e finalizimit?

PTK

Menjëherë pas hapjes së ofertave për privatizimin e PTK, kur u bë e ditur se PTK do ti shitej Axos&Najafi për 277 milion euro, lideri i AKR doli hapur kundër kësaj forme të privatizimit, duke argumentuar se plani i tij për PTK ka qenë më i favorshëm. Sipas Pacollit, plani i AKR ishte dhënia e PTK në menaxhim një kompanie londineze për një periudhë 6 vjeçare, pas së cilës PTK do të kthehej në menaxhim të Qeverisë së Kosovës dhe shteti do të përfitonte të hyra më të mëdha dhe një kompani të modernizuar publike. Ky “kundërshtim” i tij nuk u shoqërua me veprim konkret, pasi që vetë anëtarët e partisë së tij anëtar të Komitetit Drejtues për Privatizimin e PTK votuan për shitjen e kësaj ndërmarrje për 277 milion euro. AKR dhe lideri i saj nuk njihen për konsistencë të veprimeve, por me marrjen në menaxhim të MZHE tani e ka mundësinë që deri më 6 qershor të këtij viti, të anulojë nënshkrimin e kontratës për shitjen e PTK. Nuk mendoj se plani i AKR është më i miri, por së paku të gjithë pajtohemi se shitja e PTK për Axos&Najafi është veprim i dëmshëm ekonomik për vendin. Është e vërtetë se Besim Beqaj dhe PDK kanë sjellë procesin deri këtu, por Fadil Ismajli do të nënshkruajnë marrëveshjen për shitjen e PTK, nëse AKR nuk ndryshon kursin e tanishëm të MZHE.

Energjia

Një fushë tjetër në të cilën nuk ka treguar fare konsistencë AKR është edhe ajo e energjisë. Plani i AKR, i cili ndodhet ende në uebfaqen e kësaj partie, parasheh rindërtimin e katër gjeneratorëve të “Kosovës A”, ndërtimin e termocentralit të ri prej 630 MW me “gaz të kaltër”, dhe rikonstruktimin e gjeneratorëve të “Kosovës B”. Vetëm pak javë më parë lideri i AKR në një tubim partiak ka kundërshtuar planet e Qeverisë në të cilën bën pjesë për mbylljen e “Kosovës A” deri më 2017, zotim të cilin Qeveria duhet ta përmbush si nënshkruese e Traktatit të Energjisë. Tani që AKR ka këtë ministri në menaxhim, çfarë do të ndodhë me grupet punuese qeveritare të krijuara për përshpejtimin e mbylljes së “Kosovës A”? Po ndërtimi i termocentralit të ri me gaz të kaltër?!

Trepça

“Trepça” është ndërmarrje nën menaxhim të AKP dhe jo MZHE. Mirëpo, edhe AKP edhe Qeveria e Kosovës e dinë se ristrukturimi i ndërmarrjes “Trepça” nuk do të lihet në kompetencë të AKP dhe qeveria do të menaxhojë me këtë proces. Më 25 gusht 2010 Qeveria e Kosovës me vendim ekzekutiv ka aprovuar Planin për Ristrukturimin e Trepçës dhe përgatitjen e saj për tërheqjen e investimeve. Pacolli me çdo kusht ka insistuar që ai të ketë kompetenca mbi “Trepçën”, duke insistuar që kjo kompani ti jepet në shfrytëzim Princit të Kentit dhe ajo të regjistrohet në bursën e Londrës. Insistimi i tij për “Trepçën” dhe dhënia në shfrytëzim të saj një personi të caktuar, pa asnjë procedurë përzgjedhëse sipas ligjeve në fuqi, është një nga dëshmitë më të hapura se si i qaset Pacolli dhe kjo Qeveri pasurisë publike, përmes qasjes dhe lidhjeve personale të liderëve politik.

Andaj, mos pritni ndryshime pozitive në MZHE pas ndërrimit të titullarit të saj. Madje duhet ti frikohemi më të keqes.