Me të mbytë me PowerPoint

“Me të mbytë me PowerPoint” (“Killing by PowerPoint”) është një frazë e cila i referohet dukurisë gjithnjë e në rritje të prezantimit përmes PowerPoint, ku zakonisht prezantuesit fokusohen në prezantim vizual dhe jo në përmbajtje. Kjo frazë ka hyrë në përdorim shumë më herët se kur Qeveria e Kosovës kishte përgatitur në PowerPoint vizionin e zhvillimit ekonomik të Kosovës 2011-2014. Por, “PowerPoint Vizioni i Zhvillimit Ekonomik i Kosovës” është shembulli më eklatant i thënies “me të mbytë me powerpoint”.

Pas zgjedhjeve nacionale të 2010, Qeveria e Kosovës ishte grumbulluar në qendrën e skijimit në Bansko të Bullgarisë dhe kishte hartuar “vizionin e zhvillimit ekonomik të Kosovës”. Ky plan “zhvillimor” u aprovua edhe zyrtarisht nga Qeveria e Kosovës në prill 2011. Sipas këtij Plani, në katër vitet në vijim, Kosova do të arrinte këto caqe:

• Rritjen ekonomike vjetore prej 7-8%;

• Uljen e papunësisë prej 10%;

• Përmirësimi i rangimit dhe ulja në top 40 vendet e të bërit biznes; etj.

• Privatizimin e ndërmarrjeve publike (PTK, KEDS, Kosova e Re) më së largu deri në fund të 2012; etj.

Arsyeja përse po i kthehem edhe një herë këtij “plani zhvillimor”, dokument të cilin Qeveria do të dëshironte që askush mos ta shihte, është fakti se si mund të konsiderohet e suksesshme një Qeveri e cila ja huq objektivave zhvillimor në këtë masë kaq të lartë? Si munden të mburren “vizionarët” e zhvillimit e ekonomik të Kosovës, krerët e Ministrisë së Zhvillimit Ekonomik, Ministrisë së Financave, Ministrisë së Tregtisë dhe Industrisë, Zëvendëskryeministri për Zhvillim Ekonomik dhe vetë Kryeministri, me të arriturat e tyre në zhvillimin ekonomik të Kosovës?

Dy ditë më parë, Banka Qendrore e Kosovës publikoi buletinin për trendët ekonomike për tre mujorin e parë të 2013, raport i cili edhe një herë vë në pah gjendjen e rëndë ekonomike me të cilën përballet Kosova. BQK edhe një herë konfirmoi se norma reale e rritjes së PBB për 2012 ishte 2.9%. Shumë më e ulët se shifra prej 3.9% të cilën e deklaroi Kryeministri dy javë më parë në adresimin e tij para Këshillit Kombëtar për Zhvillim Ekonomik (për Kryeministrin ndoshta nuk qon peshë dallimi prej 1% në PBB).

Një muaj më parë, Banka Botërore në një raport për Gjendjen Ekonomike në Evropën Jug-Lindore edhe një herë dëshmoi se papunësia në Kosovë mbetet në shkallën e njëjtë me atë të 2009, kurse 80% e popullsisë jetojnë në varfëri (me më pak se dy euro në ditë). Investimet e huaja direkte kanë shkuar duke rënë dhe investitorët e huaj gjithnjë e më shumë po largohen si pasojë e korrupsionit dhe haraçit. 

Edhe 14 vite pas luftës, dhe 5 vite pas shpalljes së pavarësisë, Kosova ende nuk ka një plan gjithëpërfshirës të zhvillimit ekonomik. Në mungesë të një plani të tillë, donatorët si banka Botërore, BERZH, Komisioni Evropian, vendosin në bazë të bindjeve të tyre se cilat janë sektorët potencial zhvillimor. Kosova ka nevojë për një plan gjithëpërfshirës zhvillimor serioz, por jo për plane në “powerpoint” si ai i 2011.